Sunday, June 15, 2008

Loghat Nogoghi Sombilan

Ese dah tulih blog dalam Bahaso Molayu dan Bahaso Oghang Putih. Jadi ese cubo-cuba nak tulih dalam bahaso omak se yo tu Loghat Ngogoghi Sombilan (lopeh ni se tulih LNS yo).

Somaso se sekolah monongah dulu ado kawan se budak Juho ghaso mogah. Kato eh oghang Melesia tighu cakap orang Juho. Ese jawab sobona eh kau tu yang ghugi. Aku ado dua bahaso yo tu Bahaso Molayu dan satu lagi Bahaso loghat aku LNS. Samo juo dongan oghang Kolantan, Kodah dan Peghak. Kau ado satu Bahaso yo. Sapo tighu sapo aku tak poduli.

Ado soghang derebar se yang kaghang dah pencen inghat se ni tak tau nak cakap LNS. Ese jawab bulih. "Tak ponah donga pun" kato eh. Ese jawab "tengok tompek yo". Bilo se mulo cakap LNS dongan dio baghu dio topoghanjat.

Sapo yang baco ni mungkin heghan konapo se pangge dighi se ni "ese" atau "se" dan bukan "eden" atau "den". Sobona eh sobutan "eden" atau "den" tu yo lah bahaso kasa. Samo lah macam oghang Molako anggap "aku" tu sobagai kasa (kalau tak salah se lah). Omak se sobut dighi eh "ese", "se" dan "ayo" tengok koadaan. Dongan ogang mudo dio sobut "ese" atau "se". Dongan oghang tuo dio sobut "ayo". Dio tak ponah se donga sobut "eden" atau "den". Jadi se pun ikut omak se lah.

Jangan ingat ogang Noghosi Sombilan yo yang cakap LNS. Besan-besan se (montuo Halimi, omak ayah Zura) duduk di Boghanang, Solangor tapi cakap LNS. Sampaikan cucu-cucu se Danial dan Fahim bulih sikit-sikit cakap LNS dek mondonga atuk dan nenek eh cakap macam tu. 

Samo yo besan-besan abang se, oghang Masjid Tanah, Molako tapi cakap LNS yo. Sayang sokali anak-anak se tak pandai cakap LNS. Anak sulong se Halimi baghu cubo-cubo nak belaja bilo dio kojo di MPS.

Ese bukan paka dalam LNS ni tapi sotau se ado sikit bezo-bezo ikut tompek. Contoh eh oghang Ghombau sobut "langsat' tu "langsek" dan "eden" atau "den" yang bahaso kasa tu disobut "dan". Ogang Jolobu pulak sobut "kono" (kena) tu "keno". Oghang kampung se ikut loghat Kolo Pilah sobab asa uso kami daghi situ.

Cumo se cukup maghah bilo ado oghang cubo nak main-mainkan bahaso omak se tu. Somaso se di Mokah dulu ado soghang jomaah daghi Kampung Gontam, Kolo Pilah tak malu-malu cakap LNS. Oghang Kolantan dan oghang Kodah pun cakap loghat masing-masing samo dio ni. Tapi masing-masing paham samo yang lain.

Kito patut banggo dongan loghat masing-masing. Somaso se duduk di Kolantan maso se bujang dulu se cumo cakap ayat Kolantan bilo se pasti oghang yang mondonga tu tak faham bahaso se. Macam mano se tak suko oghang main-mainkan loghat omak se macam tu lah se tak ondak oghang ingat se main-mainkan loghat dio.

Cukuplah setakat ni. Esok se sambung lai.

3 comments:

CoKeLaT-RaWkZ said...

Salam satu Melesio,

Den oghang Seghawak tapi den suko bonar baso LNS ni. hi hih hihi...

SheeraCharlous11 said...

Berbelit lidah try baca hahaha. Saya orang Pahang sambung belajar kat matrik kuala pilah. Nak try cakap loghat nismilan huhu.

SheeraCharlous11 said...

Berbelit lidah try baca hahaha. Saya orang Pahang sambung belajar kat matrik kuala pilah. Nak try cakap loghat nismilan huhu.