Mainan baghu

Ese baghu yo boli satu henfun baghu. Satu sobab eh oghang ghumah se dah mula sobut-sobut oghang tu, oghang ni, akak eh, adik eh sumo dah ado henfun. Lagi satu sobab se tengok kawan-kawan se dan anak-anak se sumo dah boli henfun yang canggih-canggih. Jadi se pun 'follow the trend' lah kato oghang putih. Henfun lamo tu se boghi ke oghang ghumah se.

Sobab se bolum nak lai boli henfun canggih dulu tu yo lah se dah ado kamera yang se bawak ko mano-mano. Jadi buek apo nak punyo henfun ado kamera? Yang lagi ponting eh se guno kamera tu untuk kojo. Ado yo se cubo-cubo nasib hantar gamba kek sughat kabar The Star. Bebaloi yo, dah monang seghatuih ghinggit sampai haghi ni! Se tengok pulak ado yo oghang yang monang cumo pakai henfun kamera yo. Lagi-lagi pulak maso ni se jaghang-jaghang ambik gamba kojo. Kok ado pun se guno lah kamera henfun ni. Tapi jangan koba kek boss se, yo! Nanti diambik eh balik kamera gomen se tu.

Maso se boli tu Cino kodai tu tanyo nak download lagu Molayu ko lagu oghang putih. Se jawab duo-duo eh. Tapi bilo se donga balik sumo se tak bokonan. Nasib baik dalam komputo se ado lagu-lagu Beatles. Memang se ni pominat gilo The Beatles. Se tak tau macam mano nak download, jadi se sughoh anak se Anis buekkan.

Jadi se jadikan lagu-lagu The Beatles bunyi ringtone henfun se. Untuk ringtone biaso atau koman se guno lagu 'Hello Goodbye'. Yo lah, kito mula jawab talipon dongan 'hello'. Kok se tau oghang yang pangge se tu oghang Islam se sobut Assalamualaikum. Tapi biaso eh 'Hello' lah. Bila nak habih cakap kita sobut 'bye' atau 'goodbye'.

Ado soghang kawan se bila talipon dia tontu ajak se kelua minum. Yang se suko tu keto eh Honda Accord. Jadi untuk dio ni se taghuk lagu 'Ticket to Ride'.

Bilo boss se talipon tak ado lain dio nak mintak tolong dari se. Sughoh poi situ, poi sini, buek tu, buek ni, tolong si anu tu, si anu ni. Tapi maso ni dio jaghang-jaghang pangge se. Yo lah di opis tu ghamai oghang-oghang mudo kuek-kuek bolako. Tapi boss se ni ndak yo se intai budak-budak mudo ni. "Kau jadi 'trainer' dio oghang" kato eh. Jadi untuk boss se se boghilah ringtone lagu 'Help'.

Untuk oghang ghumah se se boghi lagu paling sesuai yo tu 'Love Me Do'. Banyak lagi lagu yang sosuai untuk dio macam 'Please Please Me', 'All You Need is Love' dan 'She Loves You'. Nantilah se tuka-tuka ringtone nanti.

Ado satu lagu The Beatles lagi yang boleh dijadikan ringtone. Lagu tu yo lah 'No Reply'. Se nak boghi ni kek oghang yang se tak nak jawab talipon eh. Tapi maso ni bolum ado lai ogahng macam tu. Yo lah, sapo yang bonci se ni dan sapo pulak oghang yang se bonci.