Wednesday, July 30, 2008

Baghu nak sihat

Ini gamba se paling baghu. Anak se Anis ambik pagi tadi. Lobih sominggu ni se kughang sihat. Sampai se poi jumpo doktor dokek ghumah se tu. Lopeh tu se mintak cuti sakit. Dio tanyo nak boghapo haghi. Se jawab satu haghi cukuplah. Makan pun se koghang selegho. Solalu eh se poi ko sughau naik basika yo, tapi dek sakit se naik sekuta se tu. Baghu duo haghi ni se naik basika balik.

Dulu bilo pagi hujung minggu se selalu jogging di kawasan ghumah se ni. Ado yo se jalan kaki di lobuh ghayo Kajang - Soghomban yang tongah buek tu. Lobuh ghayo tu tigo ghatuih mito yo jauh he daghi ghumah se. Tapi kalau jalan kaki tu duo jam baghu se sampai ghumah balik. Jadi se baikki basika se yang lamo tak pakai tu. Jadi se kayuh basika se lalu ateh lobuh ghayo tu.

Tapi dek tak sihat ni tak bulih lah se nak jogging atau bobasika. Potang semalam dan pagi ni se boghosihkan kobun sayur se di belakang ghumah tu. Bopoluh yo sikit. Insya Allah hujung minggu ni kalau se dah sihat bulihlah se jogging atau bobasika di lobuh ghayo tu. Yang ponting eh hujung minggu ni se nak poi kondughi di duo tompek. Satu tu anak kawan oghang ghumah se kawin. Yang lagi satu anak kawan se sekolah pulak.

1 comment: