Bilo dah lambek, lambek yo

Lopeh se balik daghi tengok Pesta Mantai di Tapak Kem Paroi tu se toghuih balik ko ghumah nak soghahkan daun kelapo mudo tu. Lopeh tu se ingat nak gunting ghambut se. Ghambut ni tak lah panjang bona tapi dek se ado maso se pun poilah ko kodai gunting ghambut se.

Kodai biaso se lotak eh di jalan ko Taman Dato' Shahbandar, Ampangan. Se tengok duo oghang cucu se si Danial dan Fahim ghambut eh pun panjang. Mungkin ayah eh nak gunting ghambut duo-duo budak ni kek Benghanang esok. Tak apolah se bawak gunting ghambut samo atuk haghi ni.

Dah botigo tu konolah se bawak keto. Maso lalu di flet UDA Ampangan tu ado pulak paip air boco. Lori JBA dah tutup jalan. Apolah maso ni pulak paip tu nak boco? Kono pulak se pusing jalan jauh. Maso ini pulak di luar flet UDA tu ponoh dek khemah jua baghang ghayo. Pagi tadi pulak khemah ni ponoh dek oghang jua daging. Lopeh tu pulak oghang yang hampo tak dapek boli daging di Pesta Mantai Tapak Kem Paroi tu datang pulak ko sini. Jadi ponohlah tompek ni dek keto. Se kono lalu pelahan pelahan. Dah dua kali lambek.

Nasib baik di kodai gunting ghambut tu se tak lamo nunggu. Tapi dek botigo tu lambek lah sikit.

Maso nak balik tu se singgah kek stesen minyak Petronas di Jalan Jolobu. Minyak keto se ado, tapi se takut yo manolah tau duo tigo hanghi lai kok minyak habih. Se tengok somuo pam tu ado yo keto dan motosika. Se nampak satu keto Kancil baghu yo isi minyak. Se pun tunggu di belakang keto tu. Lopeh tu se tengok derebar eh poi kek kaunter. Apo pulak dio nak buek ni? Se ingat kok dio nak tambah minyak?

Lopeh tu derebar eh toghuih balik ko keto eh dan jalan. Bukanlah dio nak tambah minyak. Apo salah eh dio bawak keto eh yang dah diisi minyak tu dopan kaunter tu. Ado pun tompek lotak keto kosong dopan kaunter tu. Tigo kali lambek.

Memang yo bila se sampai ghumah oghang ghumah se Salmah tanyo (dengan loghat Melakanya) "Kenapa lambat?" Se pun coghito satu satu.

Bilo dah lambek tu, lambek yo.