Apo lambek bona ni?

Dulu bukan main copek lai pokojo Indonesia tu buek sughau ni. Tak sampai duo bulan dah togap. Lopeh tu tingga kojo-kojo kocik macam nak pasang pintu, pasang tingkap, masuk air, masuk api dan apo bondo eh lah. 

Air dah masuk, pintu dan tingkap dah naik. Jeriji cumo kek tingkap yo. Kek pintu bolum pasang lai. Jalan masuk dah tughap dek tar. Nampak se yang tingga cumo api bolum masuk, kapet bolum pasang dan pintu pagar tak ado lai. Bilo lai tu? 

Gamba ateh tu se ambik ompek haghi dulu. Maso tu jalan tu baghu ditughap. Lopeh tu tak ado apo-apo kojo lai. Pagi semalam se nampak ado lori boghonti dopan sughau tu. Ghupo-ghupo eh budak-budak kojo pasang wayar, lampu dan kipeh. Se tanyo "buek apo haghi ni?" Jawab kotuo eh "cek wayar sikit bang, sumo eh okey." 

Se tanyo lai "bilo nak masuk api?". Jawab eh "itu kono tanyo TNB, bang. Kito tak ado koso. Borang sumo kito dah masuk."  Yo tak yo jugak. Buek malu yo se tanyo.

Haghi ni se tinjau-tinjau yo kek sughau tu. Se kolua yo daghi ghumah nampaklah sughau tu. Dulu ado yo somak yang tutup sikit pandangan se. Tapi se dah mintak jaso baik kontrektor potong ghumput kolam antagho sughau dongan ghumah se tu potong somak tu. Tu dah di buek eh. Se dah kona kontrektor tu maso se masih kojo dulu. Rusli namo eh dan baik oghang eh.

Tapi haghi ni daghi pagi sampai potang se tak nampak apo-apo kojo pun. Ndak ndak esok ado lah apo-apo.