Nyaghih losap RM 5,000

Surau Bandar Merlimau, 100 meter dari Merlimau Inn.

Dah lamo se tak nulih dalam bahaso ni. Sapo tak paham tanyolah, yo. Se nak coghito nyaghih losap duit RM 5,000 hujung minggu baghu ni.

Keluargo bini se buek kondughi arwah di ghumah kampung eh di Merlimau (oghang Molako sobut Melemo) di Sabtu malam dulu. Mulo-mulo se ingat nak balik Somban yo lopeh tu. Tibo-tibo bini se cakap bigheh se Amir pun nak buek kondughi samo haghi Ahad siang lopeh tu. Topaksolah se tido di Melemo.

So tak soleso tido di ghumah kampung tu, jadi se pun tompah nak duduk satu satu eh hotel di Melemo tu. Namo hotel tu Merlimau Inn. Mulo-mulo se ingat anak-anak se Miza dan Anis samo-samo nak balik, jadi se tompahlah bilik keluargo. Tibo-tibo budak boduo tu tak dapek balik. Nak tengok wayang di Somban, kato eh. Jadi se balik boduo yo samo bini se. Nak tau lobih lanjut Merlimau Inn silo tengok sini ha.

Kami singgah dulu di Payo Ghumput kondughi kawin sodagho bini se. Sampai yo kek hotel tu  se tanyo ado tak bilik kocik sikit, sobab kami boduo yo. Nasib baiklah ado lai, jadi mughahlah sikit sewo eh. Tapi bilik tu bolum siap lai. Bila poi kek bilik tu soghang pokoje eh pompuan India bonamo Usha sodang mengomeh bilik. Oh, ini ghupo eh Usha, sobab se talipon nompah bilik ni samo diolah.

Sambe Usha ngomeh bilik sompek yo dio bobughak samo bini seh. Yo lah oghang pompuan, ado yo coghito eh. Dipendekkan coghito kami pun tido di hotel tu malam tu lopeh kondughi di ghumah kampung bini se.

Pagi esok eh kami jalan kaki poi minum di pokan Melemo. Maso balik hotel hujan tughun ghonyai-ghonyai dan se pogang tangan bini se kuek-kuek. Toghingat se maso kami buek Haji di Mokah dulu. Macam tu lah se pogang tangan bini se kuek-kuek.

Lopeh minum pagi se hanta bini se balik ko ghumah kampung eh. Dio nak nolong adik eh Kanah, bini Amir tu lah. Se pun duduk di bilik hotel sambe jongok komputer ni. Coghito yang se baco tak do lain coghito BERSIH 2.0. Tak payahlah se boghi tau apo natang eh BERSIH 2.0 tu.

Topat jam duo boleh tongah haghi se pun kolua hotel. 'Check-out' kato oghang putih. Sobolum tu habih selughuh bilik se belek-belek kok ado baghang tingga. Baghang-baghang bini se pulak dah siap masuk beg eh, jadi se tak geledah pulak katil eh. Maso se nak kolua se nampak Usha tongah ngomeh satu bilik lain samo soghang lai pompuan. Tapi se tak pasti pompuan tu Melayu kito ko atau Indonesia. Usha yang solosaikan 'check-out' se.

Se pun poi kondughi ghumah Amir. Lopeh makan dan bobughak sikit kami pun mintak dighi nak balik Somban. Anis pun nak balik ko PD potang tu yo.

Di lobuh ghayo dokek Podeh talipon se bobunyi. Se tengok numbo eh macam biaso yo. Sogho pompuan yang cakap dan bini se toghuih joling. Ghupo eh Usha yang talipon. Dio kato ado baghang bini se yang tingga. Se tanyo apo lai yang tingga, sobab se dah belek bilik tu habih-habih. Dio kato ghantai leher bini se, dio jumpo bawah bantal.

Se toghuih tanyo bini se dan dio jawab memang yo ghantai eh dilotak eh bawah bantal. So pun boghi talipon kek bini se dan dio pun bobincang samo Usha macam mano nak dapekkan balik ghantai tu. Itu tak ado masalah sobab adik dan kakak bini se ado di kampung.

Lopeh tu bini se cakap nasib baiklah Usha tu tak panjang tangan. Dio pun dah kona Usha tu bilo Usha komehkan bilik kami semalam. Se jawab biaso eh pokojo hotel ni tak panjang tangan. Se tambah lagi tadi se nampak ado soghang lagi pompuan tolong Usha. Tak tau lah pulak apo nak jadi kalau pompuan tu yang jumpo ghantai tu. Tapi kito janganlan bosangko bughuk.  

Lopeh tu se tanyo boghapo nilai ghantai tu. Bini se jawab ghantai tu arwah omak eh yang boghi. Maso dulu ghogo eh RM 3,000. Maso ni mungkin dah naik RM 5,000.

Kalau sah hilang dan bini se mintak se ganti, tak dapek se nolong do.