Sunday, January 31, 2010

Budak Nogoghi Sombilan lai?

Dah lah baghu-baghu ni kito donga, tengok dan baco coghito budak di Gomonceh tu bunuh ompek oghang sodagho eh. Duo tigo haghi ni pulak ado soghang lagi budak kono cokup dek Polis.

Salah he? Dio tulih dalam blog eh coghito mombughukkan Almarhum Sultan Johor yang baghu mangkat tu. Mulo-mulo se ingatkan sapo yang nulih tu tontu oghang Juhor. Ghupo-ghupo eh budak kito. Jang. Budak Nogoghi Sombilan. Se panggi dio Jang sobab maso dio tulih tu dio bolum kawin lai.

Buek apolah kau campo hal oghang, Jang? Banyak kojo lain lai kau bulih buek. Banyak coghito lain lai kau bulih tulih. Macam se ni ha, mulo-mulo dulu se takut yo apo yang se nak tulih ni? Tapi bilo dah mulo tu macam tak bulih boghonti pulak.

Tapi se hati-hati yo nak tulih. Dulu ado se nyontuh politik sikit. Sikit yo, bukan banyak. Lopeh tu se kono hontam. Joghan se. Sobab eh se ni memang tak pandai main politik.

Tapi syukurlah Jang ni dah buang pos eh daghi blog tu. Dio pun dah mintak maaf. Se setuju pado cadangan Montoghi dari tompek se Jolobu tu supayo Jang ni dimaafkan jo.

Lopeh tu jangan buek lagi macam tu yo.

3 comments:

Anonymous said...

Maarof

Sebona eh, dalam hal ini ese pun terperanjat. Apo posal eh orang Kg. Panchor, Seromban, tulih hal mengburukan almarhum Sultan Johor tu. Ese pun tidak faham.

Dalam Islam, jangan lah seseorang lain memburukkan saudara se Islam yang sudah meninggal dunia. Berdoso.

Ese lagi tak faham apo domdam eh budak tu (kok ado lah) kepada almarhum tu.

wassalam
MA

abdulhalimshah said...

Tuan Hj Arop,
Kato orang tuo, cakap siang pandang pandang, cakap malam donga donga, makno eh, jangan main cakap atau tulih sebarangan jo, walaupun dalam alam siber.
Lai pon, Jang Pancor ni lalai tak tau macam mano nak adokan perisai pado blog dio. Tolong aja kit kek kito sikit camno nak buek "perisai" pado blog kito. Salam.

Maarof said...

MA,

Se tak tau apo yang boto boto ditulih dek Jang Panchor ni. Jadi se tak tau apo yang didondam eh kek Almarhum Sultan tu.


Tuan Haji Halim,

Blog se memang tak ado peghisai. Sobab tu se tak boghani nak tulih yang bukan-bukan. Silap tulih kok kono cokup.