Thursday, October 13, 2011

Kito Soghupo!

Kopalo se dah kosong, sampai se tak tau apo yang nak ditulih di blog ni. Maso se nulih ni tajuk eh pun ontah apo. 

Malam tadi macam biaso se poi solat di sughau. Lopeh maghrib se pun duduk noghar ceghamah. Tak payah lah se boghi tau sapo yang boghi ceghamah tu. Tapi macam biasolah ceghamah tu tak sodap kalau tak ado coghito politik. Maso ni pulak oghang asyik coghito pasal bajet tahun dopan. Jadi penceghamah tu pun masuklah sikit coghito bajet tu.

Dio kato kalau sapo-sapo yang janjikan apo-apo dalam bajet untuk tujuan undi dio atau pati dio maso pilihanghayo dah buek salah. Itu rasuah namo eh. Se ado yo nonga sikit-sikit maso bajet itu dibontangkan itu haghi. Itu pun maso se bawak kogheto. Maso dah pencen ni se maleh nak donga cogjito bajet ni. Bukan banyak bona se dapek nanti. Tapi se sompek donga oghang macam se ni kalau naik LRT atau Monorail Kolo Lumpo dapek diskaun sotoghah ghogo tambang. Tapi yang se pasti yang montangkan bajet tu tak ado pulak sughuh se undi dio atau pati dio nanti.

Tibo-tibo se toghingat ado yo oghang yang janjikan sosatu sambe mintak kito undi pati eh. Kalau yang montangkan bajet tu janjikan duit dan padang futsal, oghang  ni janji lobih daghi tu. Dio janjikan syurgo.

Sokughang-kughang eh duit dan padang futsal yang dijanjikan bulih nampak. Tapi syurgo tu boleh dapek sonang-sonang ko? Se ni taklah pandai bona bab agamo ni, tapi se tau nak masuk syurgo tu taklah sosonang tulih huruf 'x' kek koghoteh undi. Lobih daghi tu.

Contoh eh ghamai orang yang se tau dah mampu nak buek Haji tapi sajo tak nak buek. 'Bolum ado soghu' jawab eh bila ditanyo. Tapi duit dah cukup. Setahu se lah oghang macam ni solagi dio bolum naik Haji Islam eh bolum cukup. Bilo Islam bolum cukup mano bulih masuk syurgo? Lotaklah boghapo banyak huruf 'x' pun kek koghoteh undi tu, tak dapek masuk syurgo do.

Oh maaf se, kalau banyak bona lotak huruf 'x' nanti ghosak pulak koghoteh undi tu.

3 comments:

Anonymous said...
This comment has been removed by a blog administrator.
Anonymous said...

Kau tak dtg kek sughau tmn den ni!!!! laii hebat!!! Pemimpin yg ado kek negaro kita sumo di cap jahil...bangang....jahat!!!! Ulamak lak di cap penakut...penikuih....sanggup jilat ludah pemimpin..... inil dlm khutbah jumaat......Ini lah sobab eh eden dah laghi solat jumaat tompek lain....MALANG BOTUL KAN???? KAN???? KAN???

Yusof Malik

Anonymous said...

Pemahaman tu kne mendalam laie. Tersirat disebalik yang tersurat. Dilihat pada luaran tak mencermin pada dalaman.