Kono batang hidung kau sondighi.

Itulah yang dapek se coghitokan bila pasukan bolasepak kito mongalahkan pasukan Indonesia di pertandingan pingat omeh Sukan Laut (maaf Sukan SEA) di Jakarta, Indonesia malam tadi. 

Se tak nampak apa sobab eh koc bola kita Ong Kim Swee dihalau kelua padang masa tim kito lawan tim Indonesia dalam liga kumpulan dulu. Tapi lopeh tu tengok dapek yo Ong becakap dongan oghang-oghang eh pakai woki toki, apo ko namo bondo tu. 

Se ingat dah habih lawan tu habihlah hukuman tu. Tapi se tengok lopeh tu maso tim kito lawan tim Myanmar semaso sepaghuh akhir Ong Kim Swee masih tak bulih tughun  padang. Mulo-mulo se nampak Ong pakai henpon, lopeh tu tak ado lai. Itu pun tak boleh pakai. Mano ado undang-undang dalam dunio ni tak boleh pakai henpon dalam stadium? Kok dalam spita atau mahkamah boleh cayo lah. 

Konolah Ong Kim See hanta arahan pakai koghoteh yo. Boghulang aliklah penolong eh bawak koghoteh yang botulih arahan dari Ong Kim Swee tu. Agak eh oghang Indonesia ni tak dapek caghi sobab konapo tak bulih tulih apo-apo di koghoteh dalam stadium. Kalau tidak koghoteh tu pun dighampeh eh. 

Kosian Ong Kim Swee mulo-mula duduk soghang di tompek duduk dalam stadium tu. Tibo-tibo datang Ahmad Shabery Chik, montoghi sukan kito duduk sobolah Ong Kim Swee. Se bulih sobut Ahmad Shabery ni pakai namo yo sobab dia samo sekolah dongan se. Dio junior se, kalau jumpo se dia kono pangge se ni abang.

Lopeh tu pulak bilo tim kito dapek kalahkan tim Myanmar tu Ong pun nak tughun dalam padang jumpa anak-anak buah eh. Itu pun tak diboghi dek oghang Indonesia ni. Gem dah habih, mano bulih pakai undang-undang lai? Lopeh tu tak tau lah se samo ado Ong samo-samo naik kegheto barrakuda samo anak-anak buah eh bilo balik ko hotel. Tapi elok yo tim kito naik keto peghisai namo ikan yu tu. Kok kono baeh budak-budaki kito dek batu siah palih yo.

Tibolah maso eh kito jumpo balik dongan Indonesia. Tapi se tau tim Indonesia dah lomah sikit daghi tim kito. Potamo gem sepaghuh akhir eh lawan Vietnam tu duo jam lewat daghi gem kito lawan Myanmar tu. Jadi budak-budak kito ado maso rehat duo jam lobih dari budak-budak Indon tu. Koduo maso Indonesia lawan Vietnam padang basah dek hujan. Padang eh dah lah tak elok, bilo kono hujan jadi 'soggy' kato oghang putih. Sapo yang main ateh padang macam tu copek lotih. 

Itu salah satu sobab Vietnam kalah samo Myanmar masa gem pingat gangso. Pado hal Vietnam johan kumpulan liga eh. Kaki-kaki budak Vietnam tu dah lotih dek main ateh padang 'soggy' lawan Indonesia.

Tapi Indonesia masukkan gol dulu. Lomah yo hati se nengok eh. Tapi lopeh tu tim kito bangkit balik dan dapek satu gol yang kato Zainal Abidin Rawop 'gol lucu'. Memang lucu gol Malaysia tu kalau dibandingkan samo gol Indonesia mulo-mulo tu. 

Tapi ado satu lagi gol lucu. Gol terakhir Malaysia maso tondangan penalti tu pun lucu yo. Se bolum ado tengok gol penalti meleghet masuk dalam gol. Lopeh kono penjago gol pulak tu. 

Mano-mano oghang Indonesia yang tengok kodua-duo gol Malaysia yang lucu tu memang sakit hati. Tapi bagi se apo yang bulih se cakap iolah 'Padan muko kau, kono batang hidung hidung kau sondighi'.