Sojak KTM konakan keto api komuter eh se dah bopuloh kali naik. Oghang Soghomban memang untung sobab sapo yang naik daghi stesen Soghomban mesti dapek tompek duduk. Tak macam sapo sapo naik di Kajang ko, kono bodighi.
Kalau balik Soghomban pun mungkin dari Kuala Lumpur kono bodoghi, tapi bilo sampai Kajang biaso eh dapeklah tompek duduk.
Tapi tak lai sekaghang ni. Sapo sapo naik KTM Komuter dari Kuala Lumpur ko Soghomban bolum tontu dapek tompek duduk. Cumo yang toghuih sampai Senawang atau Sungai Gadut mungkin dapek duduk kojap dari Soghomban.
Ini makno eh ponumpang KTM Komuter dah botambah. Dulu di stesen Nilai cumo dua tigo koghek yo yang naik, tapi haghi ni yang naik di Nilai tu bulih isi satu bas. Lai pulak KTM dah tambah stesen, Mid Valley, Senawang dan Sungai Gadut yang se tau. Di Bandar Tasik Selatan pulak dah ado Terminal Bas Selatan (TBS) sobolah stesen KTM Komuter tu. Ini pun monambahkan ponumpang KTM.
Sopatut eh bilo botambah ponumpang dan stesen, keto api pun patut eh botambah yo. Ni tidak, dulu bilo naik keto api daghi Soghomban ko KL solalu yo selisih dongan keto api komuter dari Rawang. Bilo selisih tu sapo yang lolap tido tojago dek eh. Tapi haghi ni tak lai. Daghi Soghomban ko KL selisih duo atau tigo KTM Komuter yo. Ini makno eh jumlah keto api komuter dah makin kughang.
Semalam se poi KL naik KTM Komuter, sobab soghang kawan blogger se ajak poi ghayo . Macam biaso dari Soghomban dapek tompek duduk. Itu pun se kigho tompek duduk keto api tu dah 80% ponoh. Daghi Nilai lai ponumpang dah mulo bodighi. Nasib dio oghang lah. Se tughun di Bandar Tasik Selatan dan daghi situ naik STAR ko Bandar Tun Razak dimano kawan blogger se tunggu.
Maso balik pulak kawan se tu hanta se kek Mid Valley. Dio kato kalau tak salah ado stesen KTM di Mid Valley. Se jawab bukan tak salah lai, memang yo ado stesen kek situ.
Bilo se tughun yo ko stesen dah ado dalam sepuluh oghang sodang menunggu. Ini makno eh keto api baghu jalan dalam limo ko sepuluh minit.
Lopeh tu se tunggu lah dokek so jam. Oghang pun botambah macam dah bulih isi tigo buah bas. Bilo datang yo keto api macam biasolah kito boghi peluang oghang tughun dulu.
Macam biaso se dapek masuk sobab dah biaso boghobut ni. Itu pun se tengok ado ponumpang totingga tak dapek masuk sobab keto api dah ponoh.
Dalam keto api se tak dapek bogoghak 5 centimeter pun dek sosak eh. Sampai Serdang baghu lah logo sikit, itu pun bodighi yo.
Sampai Kajang adolah tompek duduk kosong, tapi soghang pompuan Melayu belakang se dah duduk. Lopeh tu dio peghasan se dan sughuh se duduk tompek dio. Se mulo mulo tak nak, tapi dio sughuh duduk jugak, agek eh dio tengok se ni dah tuo. Se pun ucap timo kasih dan pompuan tu bodighi balik.
Sampai di stesen UPM ado ponumpang sobolah se tughun. Se toghuih taghik beg tangan pompuan tadi dan sughuh dio duduk sobolah se. Sodap yo hati se dapek baleh budi pompuan tadi.
Macam se cakap tadi sampai Soghomban pun masih ghamai yang bodighi.
Tolonglah tambah koc copek, KTM!
3 comments:
suko tuan aji dapek duduk sobolah pompuan yo hehe...se gughau yo. Dulu se poie kojo kek PJ naik komuter gak. Makin lamo makin ghamai plak ponumpang. Se tukar naik bas plak. Naik bas confirm dapek duduk. Asal ponoh yo bas toghuih jalan.
se cadangkan sesapo nak poie KL, naik bas yo lah. Kalau nak poie Serdang ko, Bangi ko, tak dapek la den nak nolong hehehe
Assalammualaikum,
Se dah bertahun-tahun tak naik komuter. Pak Tuo rajin bona naik komuter. Se yang mudo nie, ke sano-sini dengan keto ajo.
Den poi balek kojo naik komuter ni lah. Asek lambek yo... batal ...tergondalo... itulah kojo eeeeee.....
duduk dalam beghasap.... buek ponek jo ada erkon... tapi ..paneh ie macam duduk bawah matohari.... susah2 ganti yo dongan kipas angin kilang tu... kipeh angin ni jarang rusak... gas pun tak payah isi... jimat tu...
Post a Comment