Sunday, October 12, 2008

Penyangak, peminum arak dan Shah Ruth Khan

Semalam se baco ado oghang tak pueh hati si Shah Ruth Khan tu dapek Datuk daghi nogoghi Molako. Ini ingatkan se boboghapo taun dulu jadi pongighing Gabenor Sumatera Barat (Sumbar) yang namo eh Hasan Basri yang dapek Dato' Seri Utama dari Yam Tuan kito.

Se pun dapek masuk ko Balai Rong Seri (tolong boto kan kok salah se nyobut eh) Istana Bosa Soghi Monanti tu. Somontagho monunggu Yam Tuan tibo se pun tengok koliling se. Kobanyakan yang ado situ pun nak toghimo pingat yo. Ado yo duo tigo koghek yang se kona kek Soghomban tu. Se tanyo dio eh 'Dapek apo?' Ado yang jawab 'PMC' dan 'ANS'. 'PJK' tu tak mainlah.


Bukan apo, se tau bona poghangai oghang-yang yang se tanyo tu. Ado yang jadi ponyangak di Soghomban tu. Ado soghang tu se jumpo boboghapo kali minum aghak di dangdut kek Soghomban tu.

Oh yo, yang se masuk kek dangdut tu buek apo? Tak do, se poi situ buek kojo. Cumo se tak ado koso nak ambek tindakan kek oghang Islam minum aghak tu. Tapi bilo se samo-samo Jabatan Agama Islam Negeri Sembilan (JAINS) ado yo se nampak dio oghang koluakan sughat saman kek oghang Islam minum aghak ni. Nak bukti eh sonang yo. Dio oghang gunokan alat sukat aghak dalam napeh (Breath tester). Ado sokali tu se minum dulu Coca Cola dan sughoh dio oghang poghekso napeh se. Sahlah se tak minum aghak.


Oh dah melencong pulak se. Coghito eh macam ni. Kok di sini ponyangak dan pominum aghak pun dapek pingat apo lai Shah Ruth Khan tu?

Daghi tu se dah niat tak nak toghimo apo-apo pingat dari Istano Soghi Monanti tu. Ado yo opis se sughoh se isi borang pingat tu. Sumo eh se buang dalam tong sampah.

Cuma pado tahun 2003 se disughoh isi borang pingat dari Yang Di Pertuan Agong kito. Ini se isi dan hanta. Kughang-kughang eh se dapek yo masuk ko Balai Rong Seri Istana Negara tu. Di bilik tu lah somuo Yang Di Pertuan Agong dan Perdana Menteri kito angkek sumpah. Itu se coghito kek oghang ghumah se Salmah. Bukan main suko lagi dio. Bilo dio nampak Yang Di Pertuan Agong di Balai Rong Seri ini di TV ko, di sughat kaba ko dio pun coghito ado samo-samo masuk dalam bilik tu.

Dah dapek satu pingat dari Istano Nogagho tu se cakap cukup lah. Se tak nak apo-apo pingat lai.


1 comment:

hass_lann said...

A'kum Tn Haji,

good advice. Saya baru plan nak gi Umrah tahun depan. :)